माओवादी स्थायी समिति बैठक : राष्ट्रियसभाको अध्यक्ष नछाड्न नेताहरूको सुझाव

Maobadi_Sthai
लोकपाटी न्यूज
7 Shares

काठमाडौं। नेकपा (माओवादी केन्द्र)को आज बसेको स्थायी समितिको बैठकमा धारणा राख्ने अधिकांश नेताले राष्ट्रियसभामा ठूलो दलको हैसियतले अध्यक्ष आफूले लिनुपर्ने धारणा राखेका छन्।

बैठकपछि पार्टी केन्द्रीय कार्यालय पेरिसडाँडामा सञ्चारकर्मीसँग कुरा गर्दै प्रवक्ता एवम् उपाध्यक्ष अग्निप्रसाद सापकोटाले भने, ‘अधिकांश स्थायी समिति सदस्यले राष्ट्रियसभाको ठूलो दलको हैसियतले अध्यक्ष छाड्नुहुन्न भन्ने धारणा राख्नुभएको छ।’

यही फागुन २० गतेदेखि राष्ट्रियसभा अध्यक्षको पद रिक्त हुँदैछ। बैठकमा मुलुकको पछिल्लो राजनीतिक अवस्था, समसामयिक विषयमा समेत नेताहरूले धारणा राखेको भनाइ छ। माओवादी केन्द्रले आजको बैठकबाट नेताहरूको कार्यविभाजन गर्ने बताएको थियो। त्यसबारेमा भने कुनै निर्णय हुन सकेन। कार्य विभाजनका विभिन्न विकल्पबारे छलफल भएको छ। यद्यपि निर्णय भने बुधबार बस्ने बैठकले गर्ने छ।

यस्तै, आगामी चैत १ गतेदेखि तराईं-मधेशमा सञ्चालन गर्न लागिएको अभियानका अलावा पार्टीका अन्य योजनाबारे पनि छलफल भए पनि अन्तिम निर्णय भने आज नभएको प्रवक्ता सापकोटाले जानकारी दिए।

बैठकमा नेपाली काँग्रेसको हालै सम्पन्न महासमिति बैठक, सो बैठकमा पारित भएका प्रतिवेदन र व्यक्त विचारबारे समेत छलफल भएको थियो। बैठक बुधबार बिहान पुनः बस्नेछ। बैठकमा पार्टी अध्यक्ष एवम् प्रधानमन्त्री पुष्पकमल दाहाल ‘प्रचण्ड’ ले सम्बोधन गर्ने कार्यसूची छ। बैठक आज नै समापन गर्ने तयारी गरिएको भए पनि प्रधानमन्त्रीको कार्यव्यवस्तताका कारण भोलिका लागि सारिएको बताइएको छ।