कानुनमा सबै क्षेत्रको सुझाव समेट्न ‘डिजिटल प्लेटफर्म’ तयार गर्दैछौं : मन्त्री गिरी

Padam_Giri
लोकपाटी न्यूज
0 Shares

काठमाडौं। कानुन, न्याय तथा संसदीय मामिलामन्त्री पदम गिरीले विद्यमान ऐन, नियम तथा कानुनमाथि सबै क्षेत्र तथा नागरिकको सुझाव समेट्नका लागि मन्त्रालयले ‘डिजिटल प्लेटफर्म’ निर्माण गर्न लागेको बताएका छन्।

आज यहाँ आयोजित नेपाल वितरक महासंघको १२औँ वार्षिक साधारण सभा कार्यक्रममा उनले कानुनमा भएका व्यवस्थाका कारण कुनै पनि क्षेत्रलाई काम गर्न अप्ठ्यारो नहोस् भनेर सुझाव लिने संयन्त्र तयार पारिने बताएका छन्।

‘देशभित्र भएका नागरिकले जुनसुकै पेसा व्यवसाय अँगाल्दा कुनै ऐन अथवा कानुनले समस्या पारेको भए त्यसलाई सहज बनाउन राज्यको दायित्व हो। कानुनी बाधाका कारण कसैलाई अवसर सृजना भएनन् र अप्ठ्यारो पारेको छ भने सुझाव दिन मन्त्रालयले डिजिटल प्लेटफर्म बनाउन लागेको छ,’ मन्त्री गिरीले भने, ‘यसरी विभिन्न क्षेत्रबाट आएका सुझाव वर्गीकरण गरेर विद्यमान कानुनमा संशोधन तथा नयाँ कानुन निर्माण गर्न सम्बन्धित मन्त्रालयसँग छलफल गर्छौं।’

नेपाल वितरक महासंघका अध्यक्ष हरिराज पन्तले विभिन्न कम्पनीबाट उत्पादित तथा आयातित वस्तुलाई उपभोक्तासम्म पुर्‍याउने काम वितरकले गरिरहेका भए पनि विद्यमान वाणिज्य ऐनमा यस सम्बन्धी व्यवस्था नरहेको बताए।

‘वितरकहरू विभिन्न ४२ जिल्लामा संगठित नै भएर काम गरिरहेका छन्। नेपालको अर्थतन्त्रमा टेवा पुर्‍याउँदै आएको यो क्षेत्रलाई कानुनले भने चिन्दैन,’ अध्यक्ष पन्तले भने, ‘विद्यमान वाणिज्य ऐनमा वितरकसम्बन्धी व्यवस्था नभएका कारण यो व्यवसायमा आबद्ध भएकाहरूले विभिन्न समस्या भोग्नु परेको छ। अवैधानिक भनेर जरिवाना तिर्नुपर्ने अवस्था छ। ढुवानीका सवारी साधन व्यवस्थापनमा उस्तै समस्या छ।’ यस क्षेत्रका व्यवसायीप्रति राज्यले हेर्ने नजर सकारात्मक नरहेको उनको गुनासो छ। -रासस