सम्मानजनक हेरचाह ज्येष्ठ नागरिकप्रतिको दायित्व हो : मन्त्री चौधरी

Bhagawati_Chaudhari
लोकपाटी न्यूज
0 Shares

काठमाडौं। महिला, बालबालिका तथा ज्येष्ठ नागरिकमन्त्री भगवती चौधरीले साहित्यको माध्यमबाट महिला, बालबालिका तथा ज्येष्ठ नागरिकको अधिकार एवं विश्वको वातावरण संरक्षणको पक्षमा काम गर्न सकिने बताएकी छन्। काठमाडौंमा आज एक कार्यक्रममा उनले यस्तो बताएकी हुन्।

विश्वका १० देशबाट सहभागी लेखक, साहित्यकार तथा कविहरूलाई नेपालमा स्वागत गर्दै मन्त्री चौधरीले आजको मानवीय आवश्यकताको संरक्षणमा साहित्यको तर्फबाट महत्त्वपूर्ण भूमिका खेलिरहेको भन्दै प्रशंसा गरिन्।

‘विश्वमा वातावरण, महिला हक अधिकार, बालबालिकाको शिक्षा, स्वास्थ्य, मनोरञ्जन र ज्येष्ठ नागरिकहरूलाई सम्मानजनक हेरचाह, व्यवहार, स्वास्थ्यमा रेखदेख आजको विश्वको माग हो,’ उनले भनिन्, ‘यसलाई कविता, लेख, साहित्यको माध्यमबाट जनस्तरमा तपाईंहरू लागिरहनुभएको छ। अझ अभियानको रूपमा लगिदिनुभयो भने विश्वमा विकास, संस्कृतिको सम्मान, मानव, शान्ति र एकताको संसार बन्ने थियो। यसमा तपाईंहरूको ठुलो हात छ। आजैबाट यो विश्व अभियान सुरु गरौं, म तपाईंहरूको साथमा रहनेछु।’

उनले यस अभियानले सुन्दर विश्व बनाउन मद्दत पुग्ने भन्दै मानव मानवबिच प्रेम, भ्रातृत्व, आणविक हातहतियार रहित संसार बनेमा पृथ्वीको वातावरणमा पनि ठुलो संरक्षण हुने विश्वास व्यक्त गरिन्। यसले जलवायु परिवर्तन र ग्लोबल वार्मिङको समस्यालाई पनि बिस्तारै हटाउने मन्त्री चौधरीको भनाई थियो। महिला, बालबालिका तथा ज्येष्ठ नागरिक एकअर्काका परिपूरक हुने भन्दै उनले सबैको सम्मान र अधिकार संरक्षण गर्नु घर परिवारदेखि राष्ट्र र संयुक्त राष्ट्रसंघको महत्त्वपूर्ण दायित्व रहेको बताइन्।

‘सबैले ध्यान दिएमा मानव संसार सुखी र खुसी हुने थियो। आजको बालबालिका भविष्यको कर्णधार भई समयअनुसार वृद्ध हुँदै जाने हो। यसमा आमा दिदीबहिनी तथा महिलाको दायित्व कति छ। महिला हक अधिकार, स्वास्थ्य, शिक्षा लगायत उहाँका आधारभूत आवश्यकताहरू पुगेका छन् कि छैनन्,’ उनले भनिन्, ‘यी कुराहरूलाई पनि तपाईंहरूको कलममार्फत जुन भूमिका खेल्नुभएको छ त्यसलाई अझ बढाउँदै लैजान आग्रह गर्दछु।’ साहित्यिक अभियानले मानव जाति र पृथ्वीलाई समेत संरक्षण गर्ने भएकाले विश्व अभियानको रूपमा यसलाई लैजान मन्त्री चौधरीले आग्रह गरिन्।