लोकपाटी न्यूजसङ्खुवासभा। ऊर्जा, जलस्रोत तथा सिँचाइमन्त्री दीपक खड्काले स्थानीय तहका निम्ति विनियोजित बजेट उपयोग नहुँदा विकास निर्माणका काम प्रभावित भएको बताएका छन्। धर्मदेवी नगरपालिकाद्वारा मुढेशनिश्चरे बजारमा आज आयोजित एक कार्यक्रममा उनले यस्तो बताएका हुन्।
मन्त्री खड्काले विकास-निर्माणका काममा अवरोध नगर्न सम्बद्ध सबैलाई आग्रह गरे। उनले जनताको विकासका चाहना पूरा गर्न जनप्रतिनिधि तथा कर्मचारी दत्तचित्त भएर लाग्नुपर्नेमा जोड दिए। उनले ऊर्जा, जलस्रोत र सिँचाइ क्षेत्रमा समस्या समाधानमा लाग्ने प्रतिबद्धता पनि व्यक्त गरे।
जल तथा ऊर्जा आयोगको सचिवालयका सचिव सुरेश आचार्यले जलविद्युत्, पर्यटन र कृषि क्षेत्रको प्रचुर सम्भावना भएको जिल्ला सङ्खुवासभाले ती स्रोतको सदुपयोग गरी विकासमा फड्को मार्न सक्ने उल्लेख गरे। उनले आगामी १० वर्षमा २८ हजार पाँच सय मेगावाट विद्युत् उत्पादन गर्ने लक्ष्यका साथ सचिवालयले काम गरिरहेको बताए।
ऊर्जा, जलस्रोत तथा सिँचाइ मन्त्रालयका सचिव गोपालप्रसाद सिग्देलले सङ्खुवासभाको ९० प्रतिशत भाग पूर्ण विद्युतीकरण भइसकेकाले बाँकी स्थानमा पनि चाँडै बिजुली पुर्याइने बताए। जलस्रोत तथा सिँचाइ विभागका महानिर्देशक सञ्जीव बरालले पहाडी जिल्ला सङ्खुवासभामा पहिरोको जोखिमलाई दृष्टिगत गर्दै साना-साना सिँचाइका आयोजना आयोजना कार्यान्वयन गरिने बताए।
