काठमाडौं। देशका विभिन्न ठाउँबाट हातहतियारसहित तीन जना पक्राउ परेका छन्। प्रहरीले उदयपुर, ताप्लेजुङ र सर्लाहीबाट आइतबार तीन जनालाई पक्राउ गरेको हो।
उदयपुरको त्रियुगा नगरपालिका- १२ बाट चाइनिज पेस्तोल जस्तो देखिने वस्तु १ थानसहित २० वर्षीय जुलेस रायमाझी पक्राउ परेका छन्। उनी सोही नगरपालिका- ३ भुल्के निवासी हुन्।
त्यस्तै ताप्लेजुङको पाथीभरा याङबरक गाउँपालिका- ४ डुम्रिसेका ४३ वर्षीय नरेश फुयाङ लिम्बु पनि १ थान भरुवा बन्दुकसहित पक्राउ परेका छन्। उनको साथबाट प्रहरीले सोही बन्दुकमा प्रयोग हुने बारुद, सिसाको टुक्रा र दाउ १ थान पनि बरामद गरेको छ।
सर्लाहीको लालबन्दी नगरपालिका-१५ बोरे डाडाका ५० वर्षीय रामलाल मोक्तानलाई मेड इन युएसए लेखिएको रिभल्वर १ थानसहित गए राति प्रहरीले पक्राउ गरेको छ। मोक्तानको घर तलासी गर्दा उक्त रिभल्वर भेटिएकोले उनलाई पक्राउ गरिएको प्रहरीले जनाएको छ। यस सम्बन्धमा आवश्यक अनुसन्धान भइरहेको प्रहरीले जनाएको छ।