लाेकपाटी न्यूजकाठमाडाैं, १४ असार । उपप्रधान तथा रक्षामन्त्री ईश्वर पोखरेलले सरकारकाे नेतृत्व परिवर्तन नहुने बताएका छन्। सरकारको काम अहिलेसम्म राम्रो भएको भन्दै उनले हल्लाको भरमा सरकारको नेतृत्व परिवर्तन नहुने बताएका हुन् ।
सिन्धुलीमाढीमा नेपाल कम्युनिष्ट पार्टी (नेकपा)ले आज आयोजना गरेको जननेता मदन भण्डारीको ६८औँ जन्मजयन्तीका अवसरमा नेपाल कम्युनिष्ट आन्दोलनको सफलता विषयको विचारगोष्ठी समारोहमा उनले विरोधीका आरोपभन्दा पनि वास्ताविकता बुझ्न आग्रह गरे ।
सरकार सञ्चालन आलोपालो भन्ने चर्चा धेरै भएको भन्दै उनले सरकार सञ्चालनमा आलोपालो भन्ने विषय नेकपाको सचिवालयले औपचारिक ढङ्गले नजान्ने उल्लेख गरे । दुई नेताबीच भद्र सहमति भए पनि उनले अभ्रद तरिकाले चर्चा गरेकामा असन्तुष्टि व्यक्त गरे । पार्टीमा छलफल भएमा टुङ्ग्याउने तर अनावश्यक हल्लाको पछि लागेर मन खिन्न नबनाउन कार्यकर्तालाई समेत आग्रह गरे । सरकार यसैगरी चलिरहनेमा ढुक्क हुनसमेत उनको आग्रह थियो ।
सरकारले सङ्कल्प गरेको ‘समृद्ध नेपाल, सुखी नेपाली’को सपना पूरा गर्ने भन्दै उनले भने, ‘यतिबेलाको अवस्था कस्तो छ भने खोलामा धमिलो बाढी आएको छ, तर नतरी भएको छैन, कसरी तर्ने त खोला रु खुट्टाका औंलाले छाम्दैछाम्दै विस्तारै तरेजस्तै गरी तर्नु पर्नेछ, अहिलेको अवस्थामा थुप्रै चुनौती र अप्ठ्यारा रहेकाले सबैले जिम्मेवारीपूर्वक सोच्नुपर्नेछ ।’
उनले सरकारका नीति तथा कार्यक्रम र एकतापछिको साझा निर्वाचन घोषणापत्रसँगै राखेर तुलना गर्न आग्रह गरे । अहिलेको सरकार तत्कालीन घोषणापत्रभन्दा पछि नरहेको र सरकार सञ्चालनको पाँच वर्षको अवधिमा विस्तारै सबै प्रतिबद्धता पूरा हुने विश्वास व्यक्त गरे ।
कार्यक्रममा सङ्घीय सांसद गणेशकुमार पहाडीले जननेता मदनभण्डारीको योजनाबद्ध तरिकाले हत्या गरिएकाले राज्यले हत्याराको पत्ता लगाउन माग गरेका थिए ।
