इतिहासकाे पनि समीक्षा हुन्छ, हुनुपर्छ : प्रचण्ड

Prachanda
लाेकपाटी न्यूज

गोरखा । नेपाल कम्युनिष्ट पार्टी (नेकपा)का अध्यक्ष प्रचण्डले सत्तरी वर्ष पछिको यो राजनीतिक स्थायित्वको वातावरण राष्ट्रिय सहमतिका कारण सम्भव भएको बताएका छन् ।

शुक्रबार अपरान्ह गोरखाको आरुघाटमा दोस्रो आरुघाट महोत्वसको उद्घाटन गर्दै उनले भने, ‘हामीले शान्ति प्रक्रिया टुङ्ग्याए विश्वमा नयाँ सन्देश दिएका छौं । यद्यपी केही बाँकी छन्, आपसी सहमति र छलफल गरेर यो पनि टुङ्ग्याउने छौं ।’

अध्यक्षले वर्तमान संविधानलाई इतिहासकै अब्बल संविधानको संज्ञा दिँदै संविधानमा शिक्षा, स्वास्थ्य, रोजगार लगायतका विषय मौलिक हकका रुपमा समावेश राष्ट्रिय सहमतिबाट सम्भव भएको बताए । अध्यक्ष प्रचण्डले अबको एजेण्डा भनेको विकास र समृद्धिको एजेण्डा पनि राष्ट्रिय सहमति गरेर नै अगाडि बढाउनु पर्नेमा जोड दिए ।

‘हामी आफ्ना इतिहासलाई र कामहरुको समीक्षा गर्दै सच्याउन प्रतिबद्ध रहेको छ, हामी सबै मिलेर यो देशलाई समृद्धि तिर लैजानुपर्दछ,’ उनले भने ।

अध्यक्ष प्रचण्डले विकास, समृद्धि र निर्माणको निम्ति दुई तिहाई सरकारको यस्तो ऐतिहासिक अवसर कमै मिल्ने गरेको बताए ।

बुढी गण्डकी परियोजनाका लागि आरुघाटका जनताले पुर्याएको योगदानप्रति उनले धन्यवाद पनि दिए । आरुघाटमा आफ्नो उर्जाशील समय बिताएको स्मरण गर्दै अध्यक्ष प्रचण्डले सम्पूर्ण रुपले देश र जनताको पक्षमा आफूलाई समाहित गर्ने संकल्प सहित निर्णय लिएको बताए ।