निर्मलाका हत्यारा पक्राउको माग गर्दै नेविसङ्घद्धारा कञ्चनपुर बन्द

Nebi sangh banda
लाेकपाटी न्यूज

महेन्द्रनगर, १६ असोज । कञ्चनपुरको भीमदत्त नगरपालिका–२ उल्टाखामकी १३ वर्षीया बालिका निर्मला पन्तको बलात्कारपछि हत्याका अपराधी पक्राउ नपरेको विरोधमा नेपाली काङ्ग्रेसको विद्यार्थी सङ्गठन नेविसङ्घले कञ्चनपुर बन्द गराएको छ ।

हत्याको ६८ दिन वित्दापनि हत्यारा पक्राउ नपरेको भन्दै हत्यारा पक्राउ गर्नुपर्ने, अनुसन्धानका क्रममा प्रमाण मेटाउने प्रहरी अधिकृतहरुलाई कार्वाही हुनुपर्ने लगायतका मागहरु राखेर नेविसङ्घ कञ्चनपुरले एकदिने जिल्ला बन्द गरेको हो ।

बन्दका कारण बिहानैदेखि कञ्चनपुर जिल्लाको जनजीवन प्रभावित बनेको छ । बजार, व्यवसाय, कलकारखाना, उद्योगधन्दा, शिक्षणसंस्था बन्द छन् । यातायातका साधनहरु चलेका छैनन् ।

लामोदूरीबाट आएका सवारी साधनहरुलाई भने सदरमुकाम प्रवेश गर्न दिइएको भएपनि महेन्द्रनगरबाट छुट्ने लामो तथा छोटो दूरीका सबै सवारी साधनसञ्चालनमा रोक लगाइएको छ ।

बन्दकर्ता नेविसङ्घका कार्यकर्ता सडकमा भेला हुन थालेका छन् । उनीहरु फाट्टफुट्ट रुपमा खुलेका केही पसलसमेत बन्द गराउँदै हिडेका छन् । विभिन्न चोकहरुमा बिहानैदेखि टायर बालेर प्रदर्शन सुरु गरिएको छ ।

नेविसङ्घका केन्द्रीय सदस्य कैलाश चन्दले निर्मला पन्तको बलात्कार र हत्या घटनाको अहिलेसम्म पनि प्रहरीले अपराधी पक्रन नसकेको र अनुसन्धानका क्रममा प्रमाण नष्ट गर्ने प्रहरीका अधिकृतहरु समेतलाई कार्वाही गर्न भन्दै एकदिने कञ्चनपुर बन्द गरिएको बताए ।

सोमबार नेविसङ्घले जिल्लाका शैक्षिक संस्थाहरु बन्द गराएको थियो । चरणवद्ध आन्दोलनको घोषणा गरेको नेविसङ्घले आफ्ना आन्दोलनका कार्यक्रमलाई निरन्तरता दिने जनाएको छ ।

हत्यारा पत्ता लगाउन, अनुसन्धानका क्रममा प्रमाण मेटाउने काम गरेको आरोप लागेका प्रहरी अधिकृतहरुलाई कार्वाही गर्न तथा सरकारले गठन गरेको उच्चस्तरीय छानबिन समितिले गृहमन्त्रालयमा बुझाएको प्रतिवेदन रिपोर्ट सार्वजनिक गर्न माग राखेर विभिन्न सङ्घसंस्था, अधिकारकर्मीहरु समेत निरन्तर रुपमा आन्दोेलनमा रहेका छन् ।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्