नेकपाको जनसभा : ‘अब सेना बनाउँछौं’ – प्रकाण्ड

prakanda biplab sabha
लाेकपाटी न्यूज

काठमाडौं, ८ मङ्सिर । नेत्रविक्रम चन्द ‘विप्लव’ नेतृत्वको नेकपाका नेता खड्गबहादुर विश्वकर्मा ‘प्रकाण्ड’ले देश बचाउन सेना बनाउने घोषणा गरेका छन् । मङ्सिर ८ गते काठमाडौंमा आयोजित सभामा विश्वकर्माले सेना बनाउने घोषणा गरेका हुन् ।

सभालाई सम्बोधन गर्दै उनले भने, ‘अपर कर्णाली बेचियो, बुढीगण्डकी बेचियो । यो राष्ट्रघात हो । नेताहरुले आफ्नो कुर्सीका निम्ति, आफ्नो स्वार्थका लागि देशलाई दाउमा राखेका छन् । देशलाई टुक्राटुक्रा बनाउने षड्यन्त्र भइराखेको छ । पहाड, तराई र हिमाललाई अलग्गाउने कोशिस हुँदैछ । डरलाग्दो षड्यन्त्र हुँदैछ, सरकार राष्ट्रघात गरिरहेको छ । देशलाई बचाउन अब हामी सेना निर्माण गर्छौं ।’

‘यो पार्टीका नेता तपाईहरुका सेवक हुन्, जनता पार्टीका नोकर होइन’ नेता प्रकाण्डले भने, ‘हामी नेपाली क्रान्तिको सेवामा छौंं । मङ्सिर ८ गते नेपाली जनताको मुक्ति आन्दोलनका लागि ऐतिहासिक दिन हो । यो विश्व सर्वहारा वर्गलाई सहयोग गर्ने उद्देश्य हो । दक्षिणपन्थी संशोधनवादका विरुद्ध लड्न यो पार्टी जन्मिएको हो ।’

प्रकाण्डले सरकार लाचार र असफल भएको आरोपसमेत लगाए । उनले भने, ‘सुखी नेपाली, समृद्ध नेपालको नाराले देश बन्दैन, देश बनाउन काम गर्नुपर्छ । यो सरकार दलालहरुको सरकार हो, दलाल पूँजीपति सरकार हो, कम्युनिष्ट सरकार होइन ।’

biplab sabha

‘यो सरकार भ्रष्टहरुको सरकार हो, देश लुट्न बनेको सरकार हो’ उनले भने, ‘नेपालमा एउटा वायुसेवा नियम भन्ने छ । त्यहाँ जहाज किन्ने नाटक रचियो, त्यहाँ अरबौं भ्रष्टाचार भएको ओलीजीलाई थाहा छ कि छैन ? रवीन्द्र अधिकारीको लुट उनी किन सुन्दैनन् ? के उनलाई यो कुरा थाहा छैन ?’

‘महिलाहरु दिउँसो पनि बाहिर निस्कन सक्ने स्थिति छैन । हत्या र बलात्कारले जनता आजित छन्’, विश्वकर्माले भने, ‘सरकार नै निर्मला पन्तको हत्या र बलत्कारमा संलग्न छ । नत्र किन सरकारले अपराधी समात्दैन ? निर्मलाको हत्यारालाई हामी समात्छौं, कार्वाही हामी गर्छौं ।’

सभामा माओवादी नेता गोपाल किराँतीले प्रचण्डले धोका दिएको आरोप लगाए । किराँतीले भने, ‘जनयुद्धका बेला प्रचण्डलाई हामीले पनि नेता मानेका हौं । त्योबेला उनले सर्वहारा वर्ग र उत्पीडित समूदायका लागि राम्रो गरेका पनि हुन् । तर, उनी सत्तामा पुगेपछि धोका दिए ।’

त्यसैगरि अर्का वक्ता ऋषि कट्टेलले सबै माओवादी मिलेर नयाँ सङ्घर्ष गर्नुपर्ने बताए । अर्का वक्ता उमा भूजेलले क्रान्तिका लागि आफूहरुले जस्तोसुकै मूल्य चुकाउन तयार रहेको बताइन् ।

नेकपाले आफ्नो पूनर्गठन दिवसका दिन काठमाडौंमा सभा गरेको हो । सभामा नेत्रविक्रम चन्द ‘विप्लव’ आउने भनिए पनि उनी आएनन् । सभामा उल्लेख्य सहभागिता थियो ।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्