नेकपाद्वारा सुखानी शहीद स्मृतिसभाको तयारी

Communist Party Nekapa
लाेकपाटी न्यूज

झापा, १५ फागुन । नेपाल कम्युनिष्ट पार्टी (नेकपा) झापाले आगामी फागुन २१ गते बिर्तामोडमा सुखानी शहीद ४७औं स्मृति तथा श्रद्धाञ्जली सभा आयोजना गरेको गर्ने भएको छ। भद्रपुरबाट जेल सार्ने बहानामा झापा र इलामको सिमाना सुखानीको जंगलमा तत्कालीन राजनीतिक बन्दीहरु रामनाथ दाहाल, नेत्र घिमिरे, नारायण श्रेष्ठ, कृष्ण कुइँकेल र विरेन राजवंशीको २०२९ फागुन २१ गते हत्या गरिएको थियो।

सो दिनको स्मरणमा हरेक वर्ष स्मृति दिवस मनाउने गरिएको छ। नेकपा झापाले आयोजना गरेको उक्त बृहत स्मृति सभामा पार्टी अध्यक्ष तथा प्रधानमन्त्री केपी शर्मा ओली र अर्का पार्टी अध्यक्ष तथा पूर्वप्रधानमन्त्री पुष्पकमल दाहाल प्रचण्डसहित पूर्वप्रधानमन्त्री तथा पार्टीका वरिष्ठ नेता झलनाथ खनालले सम्बोधन गर्ने कार्यक्रम तय भएको अध्यक्ष चिन्तन पाठकले जानकारी दिएका छन्।

उनका अनुसार पार्टी अध्यक्षद्वय, वरिष्ठ नेता खनाल, महासचिव बिष्णु पौडेल र गृहमन्त्री रामबहादुर थापालगायत नेताहरुले सुखानी शहीद स्मृति पार्क सालबारीमा शहीदको शालिकमा माल्यार्पण गर्ने कार्यक्रम रहेको छ। शहीदको शालिकमा माल्यार्पण पछि बिर्तामोडको सुगम पेट्रोल पम्प नजिकै रहेको खुला मैदानमा वृहत श्रद्धाञ्जली सभा गरिने तय भएको अध्यक्ष पाठकले जानकारी दिएका छन्।

यसैबीच, नेकपा १ नम्बर प्रदेश कमिटीको बैठक फागुन १९ गते बिर्तामोडस्थित जिल्ला पार्टी कार्यालयमा र प्रदेशस्तरीय प्रशिक्षण कार्यक्रम २० गते बिर्तामोडको सिटी सेन्टरमा आयोजना गरिएको नेकपा झापाका सचिव एवं प्रचार तथा प्रकाशन विभाग प्रमूख मणिकुमार साम्पाङले जनाएका छन्।

साम्पाङका अनुसार प्रदेश कमिटीको बैठकमा १ नम्बर प्रदेश अन्तरगतका नेकपा केन्द्रीय सदस्यहरुको पनि सहभागिता रहनेछ। यस्तै २० गतेको प्रशिक्षणमा १४ वटा जिल्ला कमिटी र विराटनगर महानगर कमिटीका सचिवालय सदस्यहरु सहभागी हुने प्रदेशस्तरीय प्रशिक्षण कार्यक्रम आयोजना गरिएको छ।

नेकपा झापा जिल्ला प्रचार विभागको बिहीबार सम्पन्न बैठकले २१ गतेको स्मृति सभालाई वृहत बनाउन झापासहित छिमेकी जिल्लाका पार्टी कार्यकर्तालाई सहभागीताका लागि आव्हान गर्ने निर्णय भएको प्रचार तथा प्रकाशन विभागका उपप्रमूख सन्तोष आचार्यले जनाएका छन्।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्