नेकपाले रोक्यो प्रदेश भेला र प्रशिक्षण

cpn-nekapa
लोकपाटी न्यूज

काठमाडौं। सरकारले कोरेना भाइरसको सम्भावित जोखिमबाट टाढा रहनका लागि ठूला सभा/सम्मेलन नगर्न गरेको आग्रहअनुसार सत्तारुढ दल नेकपाले जारी प्रदेशको आन्तरिक भेला, प्रशिक्षण रोकेको छ ।

प्रदेश १ को झापा विर्तामोडमा म‌ंगलबारका लागि राजनीतिक प्रशिक्षण तथा भेला कार्यक्रम तय भएको थियो। तर बिहानै उक्त कार्यक्रम रोक्न केन्द्रले निर्देशन दिएको प्रदेश १ का इन्चार्ज तथा स्थायी समिति सदस्य भीम आचार्यले जानकारी दिए।

विर्तामोडको सीटी सेन्टरमा मंगलबार हुने प्रशिक्षणमा नेकपाका अध्यक्ष पुष्पकमल दाहाल प्रचण्ड, पार्टीका वरिष्ठ नेता झलनाथ खनाल, महासचिव विष्णु पौडेल, सचिवालय सदस्य रामबहादुर थापा बादल लगायतका नेता जाने कार्यक्रम तय भएको थियो।

तर बिहान मात्रै नेताहरुले हाललाई कार्यक्रम स्थगित गर्न प्रदेश पदाधिकारीलाई निर्देशन दिएका हुन्। निर्देशनपछि अनुसार झापा जान एयरपोर्ट पुगिसकेका गृहमन्त्री रामबहादुर थापा बादल फर्किएका छन्। वरिष्ठ नेता झलनाथ खनाल भने कार्यक्रमका लागि हिजो नै झापा पुगिसकेका थिए।

आज प्रशिक्षण कार्यक्रम गर्ने र भोलि सुखानी शहिद स्मृति दिवसको अवसरमा आयोजित कार्यक्रमलाइ नेकपा अध्यक्ष प्रचण्ड र महासचिव विष्णु पौडेलले सम्वोधन गर्ने गरी कार्यक्रम तय गरिएको थियो।उक्त कार्यक्रम पनि अब स्थगित भएको छ।

नेकपाले यस अगाडी कर्णाली प्रदेश, सुदुरपश्चिम प्रदेश, ५ नम्बर प्रदेश , गण्डकी प्रदेश र बाग्मती प्रदेशमा पार्टी प्रशिक्षण तथा राजनीतिक भेलाको आयोजना गरिसकेको थियो। प्रदेश १ र २ मा मात्र बाँकी थियो।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्