नेकपामा घट्याे सदस्यता शुल्क र लेबी : कसको दर कति ?

Nepal Communist party
लोकपाटी न्यूज

काठमाडौं। सत्तारुढ दल नेपाल कम्युनिस्ट पार्टी (नेकपा) ले पार्टी सदस्यता शुल्क घटाएको छ। पार्टीको गत फागुन १८, २०७६ मा सम्पन्न केन्द्रीय सचिवालयको बैठकले पार्टी सदस्यता शुल्क घटाउदै नयाँ कायम गरेको हो।

२०७५ जेठ महिनादेखि लागू हुने गरी संगठित सदस्यता शुल्क मासिक रु. २५ र साधारण सदस्यता शुल्क मासिक रु. १० कायम गर्ने निर्णय गरेको महासचिव विष्णु पौडेलले जानकारी दिए। यसअघि नेकपाले संगठित सदस्यबाट रु. ५० र साधारण सदस्यबाट रु. २५ कायम गरेको थियो। गत माघमा सम्पन्न केन्द्रीय समिति बैठकमा विधान संशोधन गर्दै नियमावली परिवर्तन गर्ने निर्णय गरेअनुसार नेकपाले नयाँ सदस्यता शुल्क कायम गरेको हो।

तर नेकपामा संगठित सदस्य कति र साधारण सदस्य कति छन् भन्ने एकिन छैन। ‘दुवै पार्टी एकीकरणपछि सदस्यता नविकरण गर्ने काम भइरहेकाले त्यो नसक्दासम्म यति नै संख्या छ भनेर भन्न सक्ने अवस्था छैन’ नेकपा केन्द्रीय कार्यलयका सचिव इश्वरी रिजालले जानकारी दिए। यसअघि नेकपाले सरदर संगठित सदस्यमात्रै ८ लाख रहेको सार्वजनिक गरेको थियो। उनका अनुसार नेकपामा सदस्यता शुल्क धेरै भयो भनेर तल्लो तहबाट गुनासो आएपछि नयाँ सदस्यता शुल्क निर्धारण गरिएको हो।

त्यस्तै नेकपाले नोवेल कोरोना भाइरस संक्रमणलाई मध्यनजर गर्दै पार्टीको विशेष अभियानमा केही थपघट गरेको छ। जसमा ठुला सभा सम्मेलन नगर्ने र कोरोना संक्रमण फैलन नदिन प्रत्येक कमिटीलाई प्रभावकारी ढंगले काम गर्न निर्देशन दिएको छ। नेकपाले संक्रमण फैलन नदिन जनचेतना फैलाउनदेखि सर्वसाधारणलाई आवाश्यक पर्ने, माक्सलगायतका सामग्री उत्पादन र वितरणमा जोड दिन निर्देशन दिएको छ।

नेकपाले मातहतका निकायलाई सर्कुलर गर्दै पार्टी एकता सुदृढीकरण तथा जनसम्बन्ध विस्तार अभियानको कार्यतालिका परिमार्जन गरेको जनाएको हो। पार्टी महासचिव विष्णु पौडेलले बुधबार उक्त ‘सर्कुलर’ जारी गर्दै अभियान परिमार्जित कार्यक्रम कार्यन्वयन गर्न पार्टी पंक्तिलाई निर्देशन दिएका हुन्।

सर्कुलरमा पार्टी जिल्ला कमिटीले कोरोना भाइरस र त्यसबाट जोगिने उपायका सम्बन्धमा जानकारीमूलक पर्चा तयार गर्ने र आफ्नो जिल्लाका प्रत्येक घर तथा प्रत्येक व्यक्तिसमक्ष लैजान सवै तहका पार्टी कमिटीलाई भनेको छ।

नेकपाले हाल प्रदेशस्तरका भेला तथा प्रशिक्षण चलाइरहेको थियो। तर परिमार्जित कार्यक्रमअनुसार पार्टी तथा जनवर्गीय संगठनहरुका सबै तहका कमिटीका बैठक आयोजना गर्ने, पार्टीका संगठित सदस्य र साधारण सदस्यहरुको सदस्यता नवीकरणसम्बन्धी कार्यलाई निर्धाति समयभित्र सम्पन्न गर्ने गरी अगाडी बढाउने कार्यक्रम यथावत रहेको पार्टीले जनाएको छ।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्