चिकित्सकको माग : एक महिना बिदा चाहियो

Doctor
लोकपाटी न्यूज

काठमाडौँ। विश्वभर महामारीको रूपमा फैलिएको कोरोना भाइरस (कोभिड-१९)को सन्त्रास नेपालमा पनि फैलिएको छ। सौभाग्य भन्नुपर्छ, अहिलेसम्म नेपालमा यसको संक्रमण फैलिन पाएको छैन। तर यतिमै ढुक्क भएर बस्न सकिने अवस्था नरहेको भन्दै चिकित्सकहरूले एक महिना सार्वजनिक बिदा दिन सरकार समक्ष अनुरोध गरेका छन्।

चिकित्सकहरूले सार्वजनिक बिदा दिएका खण्डमा विद्यालय, कलेजमा पढ्ने विद्यार्थी तथा कर्मचारी, कार्यालयमा कार्यरत कर्मचारी लगायत आ आफ्नो घर जाने भएकाले काठमाडौं सुरक्षित राख्न सकिने भन्दै सरकार समक्ष सार्वजनिक बिदाको लागि आग्रह गरेको बताइएको छ।

सुरुमा एक नेपालीमा कोरोना भाइरसको संक्रमण पुष्टि भएपनि उनी निको भइसकेको दाबी सरकारी पक्षको छ। त्यसयता कोरोनाको आशंकामा अस्पताल भर्ना भएकाहरूलाई कोरोनाको संक्रमण नपाइएको बताइएको छ।

यसैबिच, शिक्षा मन्त्रालयले कोरोना भाइरस (कोभिड-१९)को संक्रमणका कारण विद्यालयलाई सतर्कता अपनाउन र सामूहिक भेला, सेमिनार, गोष्ठीलगायत कार्यक्रम नगर्न मन्त्रालयले निर्देशन पनि दिएको छ। सरकारले स्कूलको वार्षिक परीक्षा चैत्रको ५ भित्र सक्न पनि निर्देशन दिइसकेको छ।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्