लाेकपाटी न्यूजकाठमाडौं, १२ असार । मंगलबार दाङ र रुपन्देहीमा चट्याङ लागेर छ जनाको मृत्यु भएकाे छ भने बुधबार मोरङमा चट्याङ लागेर तीन जनाको मृत्यु भएको छ ।
गृह मन्त्रालयका अनुसार बुधबारसम्म चट्याङका कारण यो वर्ष मृत्यु हुनेको संख्या ३१ पुगेको छ । वर्षा याममा चट्याङबाट बच्न के गर्ने भन्ने सम्बन्धमा गृह मन्त्रालयले सुझावहरु दिएकाे छ।
यस्ता छन् गृह मन्त्रालयले दिएका सुझावहरु :
घरबाहिर हुँदाः
- अग्लो र एक्लो रुखमा ओत नलाग्ने
– पौडिने र माछा मार्ने, र्याफ्टीङजस्ता क्रियाकलाप नगर्ने
– खुला मैदानमा नरहने ।
– धातुको तारबारको नजिक नबस्ने
– मैदानमा लतमन्न परेर नसुत्ने वा नखेल्ने
– मानिसको समूह वा झुण्ड तथा मेला, हाटबजार वा महोत्सवमा नरहने
– फुटबल, क्रिकेट, गल्फजस्ता खेलहरु तुरुन्त बन्द गर्ने
– गाईबस्तुहरुलाई सुरक्षित स्थानतर्फ लैजाने
– जंगलमा हुनुहुन्छ भने त्यहाँ रहेका स–साना रुखहरुका बीचमा बस्ने
– पक्की घर वा गाडी नजिक हुनुहुन्छ भने घर वा गाडीभित्र झ्याल ढोका बन्द गरी बस्ने
– नजिकै हाई भोल्टेजको तार भएमा दुई खम्बाको बीचमा ओत लागेर बस्ने
– केही गरी खुला मैदानमा परे दुई घुँडाबीच टाउको लुकाई टुक्रुक्क बस्ने
घरभित्र हुँदा:
– विद्युतीय सामग्रीहरु प्रयोग नगर्ने
– तारसहितको टेलिफोन प्रयोग गरी कुरा नगर्ने
– घरबाट बाहिर ननिस्कने
– धारामा नुहाउने, लुगाधुने वा भाँडा माझ्ने काम नगर्ने
– विद्युतीय सामग्रीको नजिक पनि नबस्ने
– अत्यावश्यक अवस्थामा मोबाइल वा कर्डलेक्स फोन प्रयोग गर्ने
– झ्याल ढोका बन्द गरी घरको भित्तादेखि टाढै बस्ने
– नुहाउनै पर्ने भएमा बाल्टिनको पानीले नुहाउने वा धुने कार्य गर्ने
– केबुल तथा एन्टेनाको तारहरु उपकरणबाट छुटाउने
– विद्युतीय सामग्रीका तारहरु प्लगबाट छुटाउने
