रासस न्यूजकाठमाडौं, २३ असार । शिक्षा, विज्ञान तथा प्रविधिमन्त्री गिरिराजमणि पोखरेलले योग शिक्षालाई स्कूल-स्कूलमा पुर्याउने बताएका छन्। पतञ्जल योग समिति नेपाल, केन्द्रीय कार्यालय भक्तपुरले सोमबार आयोजना गरेको ‘केन्द्रीय कार्यशाला गोष्ठी एवं एलोप्याथिक चिकित्सा र योग’ विषयक विविध कार्यपत्र प्रस्तुत कार्यक्रमको उद्घाटन गर्दै उनले यस्तो बताएका हुन्।
उनले विद्यालयमा योग शिक्षा पुर्याउन पाठ्यक्रम निर्माण कार्य अगाडि बढिरहेको बताउँदै विद्यालय र विद्यार्थीमार्फत योग शिक्षालाई अब गाउँ-गाउँसम्म पुर्याइने उल्लेख गरे। उनले भने, “अब सामुदायिक विद्यालयमा योग, प्राकृतिक चिकित्सा, जडीबुटीको पढाई शुरु हुन्छ, यसका लागि आवश्यक पाठ्यक्रम निर्माण कार्य भइरहेको छ।”
योगलाई शारीरिक व्यायामका रुपमा मात्रै बुझ्नु गलत भएको चर्चा गर्दै मन्त्री पोखरेलले भने, “मानिसको जीवन पद्धति बदल्न योगलाई बुझ्न र बुझाउन जरुरी रहेको छ, योगको खोज, अनुसन्धान र विस्तारलाई सँगै लैजानुपर्छ। कार्यक्रममा गैरसरकारी संस्था महासङ्घ भक्तपुरका अध्यक्ष सोम शर्मा बजगाईं, योगका गुरु दीर्घराज गिरी, बालमुकुन्द सुवाल, योग तथा प्राकृतिक चिकित्सा विज्ञ डा. हरिप्रसाद पोखरेल, पातञ्जल योग समिति नेपाल, केन्द्रीय अध्यक्ष सुदर्शन सुवेदीले योग र यसको महत्वमाथि चर्चा गरे।
कार्यक्रममा अध्यक्ष सुवेदी, केन्द्रीय महासचिव नवराज काफ्ले, डा. चन्द्रमणि खनाल, सुवर्णलाल चित्रकार, रामनाथ अधिकारी, दीपकप्रसाद नेपाल, जानुका भट्टराई लगायतले योग र प्राकृतिक चिकित्साका बारेमा विभिन्न कार्यपत्र प्रस्तुत गरी बृहत छलफल गरिएको थियो।
