सहमतिमा सङ्क्रमणकालीन न्यायलाई टुङ्गोमा पुर्‍याउन नेताहरू एकमत

लोकपाटी न्यूज
0 Shares

काठमाडौं। सङ्क्रमणकालीन न्यायसम्बन्धी विधेयकका बाँकी विषयमा सहमति जुटाउन शीर्ष तीन दल सकारात्मक देखिएका छन्। प्रधानमन्त्री निवास बालुवाटारमा आज साँझ बसेको बैठकपछि सञ्चारकर्मीलाई प्रतिक्रिया दिँदै कानुन न्याय तथा संसदीय मामिलामन्त्री पदम गिरीले सङ्क्रमणकालीन न्यायलाई टुङ्गोमा पुर्‍याउनुपर्छ भन्ने विषयमा शीर्ष दलका नेताहरू एकमत रहेको बताएका छन्।

उनले भने, ‘विधेयकका जुन-जुन बुँदामा विगतमा सहमति जुट्न सकेको छैन, ती विषयमा सहमतिमा पुर्‍याएर टुङ्ग्याउने भन्नेमा उहाँहरू एकजुट हुनुहुन्थ्यो।’ शान्ति प्रक्रियाको पूर्णता र सङ्क्रमणकालीन न्यायसम्बन्धी विधेयकका विषयमा केन्द्रित बैठकमा सङ्क्रमणकालीन न्यायसम्बन्धी विधेयकलाई कसरी अगाडि बढाउने, शान्ति प्रक्रियाका बाँकी कामलाई कसरी चाँडो टुङ्ग्याउने भन्ने विषयमा छलफल केन्द्रित रहेको मन्त्री गिरीले बताए।

उनले भने, ‘सङ्क्रमणकालीन न्यायको विषयमा धेरै बुँदामा सहमति भइसकेको छ। तीन/चार वटा बुँदामा सहमति जुट्न बाँकी छ। मलाई लाग्छ यति कुरामा सहमति भइसकेपछि हामीले यो विषयमा ‘ब्रेक थ्रु’ गर्छौं।’

उनले खासगरी मेलमिलापका सन्दर्भमा पीडित पक्षको स्वतन्त्र सहमति, गम्भीर मानवअधिकार उल्लंघन र मानवअधिकार उलंघनको विषय, बालसेनामा भर्ती भनिएकाका विषयमा छलफल गरेर समान दृष्टिकोण बनाउनुपर्ने स्थिति रहेको बताए। द्वन्द्वका बेला पीडित भएकालाई कसरी क्षतिपूर्ति दिनेलगायत विषयमा छलफल हुन बाँकी रहेको उनको भनाइ थियो।

बैठकमा प्रधानमन्त्री तथा नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’, नेपाली काँग्रेसका सभापति तथा पूर्वप्रधानमन्त्री शेरबहादुर देउवा, नेपाल कम्युनिष्ट पार्टी (एमाले)का अध्यक्ष तथा पूर्वप्रधानमन्त्री केपी शर्मा ओलीलगायतका नेताहरू सहभागी थिए।